اليوم العالمي لمرضى السكر
إعداد الدكتور وليد الصاوي
سكرك كام ؟؟
سؤال لطيف كل يوم بنسمعه ، كل واحد بيسألك عشان بيعملك حاجة تشربها شاي ، قهوة ، عصير المهم أنك ترد وتقول معلقة واحدة أو اتنين أو نص أو مفيش خالص .
الكلام ده بيحصل 365 يوم في السنة الكبيسة أو 364 يوم في السنة البسيطة
طيب كده في يوم واحد فاضل هو أنا مش هرد ولا مفيش حد هيسألني
لأ اليوم ده يوم 14 نوفمبر
اشمعنا اليوم ده لأن اليوم ده هو اليوم العالمي لتوجيه الإهتمام لمرض السكر مش السكر اللي بنحطه في الشاي والقهوة والعصير والأكل ؟؟
اليوم ده سكرك كام ، يعني نسبة السكر في الدم كام ؟ واشمعنى اليوم ده في السنة كلها ؟
لأن ده يوم ميلاد فردريك بنتنج اللي شارك مع تلميذه تشارلز بيست في اكتشاف ماده الأنسولين عام 1922 والأنسولين ده كان سبب في بقاء ناس كتير على قيد الحياة .
مين صاحب قرار الإحتفال في اليوم ده ؟؟
الأمم المتحدة وعشان الأمم المتحدة العلم بتعها لونه أزرق و لوجو الإحتفال الدائرة الزرقا .
طيب ليه دائرة ؟؟
الدائرة رمز فرعوني يدل على الصحة والعافية .
يعني الفراعنة حاضرين في اليوم ده طبعا ؟؟
طبعاً لأنهم أول ناس شخصوا مرض السكر وصورة الكاهن هو بيدوق بول مريض محطوطة على معبد مشهور جداًوعشان كده إحنا أول ناس شخصنا السكر طبعاً ما إحنا بقالنا عشرة آلاف سنة موجودين
طيب أنا أعرق منين إني عندي سكر ؟؟
لو حسيت بأعراض ذي كثرة الذهاب إلى Toilet ، ونشفان الريق ، والإجهاد ممكن نبتدي نأخد بالنا
طيب أعمل إيه ؟؟
ولا حاجة تروح للدكتور يفحصك ويطمن عليك
طيب لو مااهتمش إيه المشكلة ؟؟
لأ مشاكل كبيرة جداً ( إلتهاب أعصاب طرفي – عين مش تمام – معدة مش تمام –أنت مش أنت – ده غير لا قدر الله الحاجات الكبيرة الجلطات وخلافه )
طيب بعد كل ده أعمل إيه ؟؟
مش هيجرى حاجة لو عملت سكر تراكمي واطمنت على نفسك ولو حصل حاجة روح للدكتور عشان صحتك تاج راسك وهي أهم حاجة النهاردة مشاركة مننا ننور على مرض السكر خد بالك ، روح الدكتور وهو هيطلب منك تحاليل يعرف بيها حالتك؟؟
عندك قياس السكر الصايم وده بيعبر عن اليوم كله 24 ساعة مش وقت النوم بس وعندك اللي بعد الأكل بساعتين وعندك السكر التركمي وده كل 3 شهور وده المفروض مايزيدش عن 5.5 % ولو كان من 5.5% : 6.5% هتبدي تأخد بالك إنك ممكن تبقى مريض سكر وساعتها الدكتور هيقولك تعمل إيه أما لو لقيته 7% أو أكثر هيبقى فيه تصرف تاني الدكتور هيقولك عليه
حلل وروح للدكتور وهتعرف حالتك إيه بالظبط طيب وبعدين ؟؟
أدوية السكر زادت جداً الفترة اللي فاتت وتحديداً آخر 10 سنين فيوجد أدوية كتيرة كويسة وأنواع كتير من الأنسولين الهايلة
يعني الموضوع سهل أيوه سهل جداً بس بشرط نعرف بدري نروح للدكتور نلتزم بالتعليمات وكل حاجة تبقى تمام ولكن لو أهملنا الأمور تتعقد جداً وهنفاجئ بالسكر والضغط والدهون وياسلام لو ضفنا عليهم التدخين هيبقى كده دخلنا في حلقة مفرغة الخروج منها صعبة جداً وربنا ما يوري حد
خد والدك ووالدتك إعملهم سكر تراكمي وعرف كل الناس اللي تعرفها أهمية التشخيص المبكر لمرض السكر ، مصر فيها 10 مليون مريض سكر وفي خلال 20 سنة العدد مرشح أنه يتضاعف .
نبدأ بدري ونبتدي صح هنوفر على نفسنا وعلى الدولة حاجات كتير إحنا في غنى عنها ، كلنا هنور أزرق النهاردة عشان نفكر بعض السكر والضغط والدهون الضارة اللي هي مرض العصر .
وياشركات الدواء والأجهزة إعملوا حاجة واحدة مفيدة للمرضى يستفيدوا بيها
وياوزارة الصحة حطوا السكر على الأجندة بتاعتكم
لو ابتدينا صح وابتدينا بدري هنوفر فلوس كتير والأهم صحة الناس اللي هتنعكس على الشغل والإنتاج
صحتنا تاج على راسنا ياريت نحافظ عليها ، نحارب الوزن الزيادة معركتنا تكون مع وزننا نرجع تاني ثلث طعامنا وثلث شرابنا وثلث لنفسنا
خلي 14 نوفمبر بداية جديدة للتعامل مع صحتك ومع وزنك .
ربنا يمتع الجميع بالصحة والسعادة .
